petrpavelhram (petrpavelhram) wrote,
petrpavelhram
petrpavelhram

Преставленье Петра, митрополита всея Руси; а се ему чтеніе, твореніе Прохора, епископа Ростовскаго

Это житіе святителя Петра доселѣ оставалось неизвѣстнымъ и не упоминается ни въ «Словарѣ» митрополита Евгенія, ни въ «Обзорѣ русской дух. литературы» архіепископа Филарета. Заимствовано оно изъ Сборника Новгород. Соф. библ. XVI в., въ четвертку, № 410, л. 334-338. То, что въ житіи говорится о Прохорѣ, сочинителѣ житія, въ третьемъ лицѣ, для знакомыхъ съ нашею древнею письменностію не покажется страннымь или требующимъ объясненія. Житіе это драгоцѣнно, какъ сказаніе современника-очевидца, составленное по самымъ горячимъ слѣдамъ. Епископъ Ростовскій Прохоръ скончался (7 сентября 1327 г.) менѣе нежели черезъ годъ по смерти Святителя Петра (21 декабря 1326 г.). Отче благослови! Сей святый Петръ митрополитъ родился отъ родителю крестьяну, отца Ѳедора, матери же благовѣрныя суща. Да егда ношаше мати его младенець во утробѣ, и видѣ сонъ тако: агнецъ доброзраченъ на руку своею, имущи на рогу своею древо, различный цвѣтъ имуща, — и не домыслящися о семъ, что се будеть? Родиже ся отроча, и, бысть 7 лѣтъ, нача учити грамоту сію, вскорѣ навыче всей мудрости. Бывши же ему 12 лѣтъ, иде въ манастырь и бысть мнихъ; служаше въ манастырѣ въ поварнѣ, и воду нося на всю братью, и дрова на свою раму. И пребысть въ той службѣ нѣколико, и по семъ въжелѣвъ, да навыкнетъ иконному письмени, и бысть иконникъ чюденъ, прообразуя и написа образъ Господа нашего Iсуса Христа и Святыя Богородица, пророкъ и апостолъ, мученикъ, святыхъ, когождо по сличью образа ихъ и писану написывая. А посту и молитвѣ прилежа, яко же никто же инъ въ нынѣшнее время, и къ сему милостыню творя, яже притяжа отъ праведныхъ своихъ трудъ. И посемъ постави церковь святаго Спаса на рѣцѣ Рати, и створи монастырь, и собра братью, и прилежаше соувѣтомъ, уча о спасеньи душъ ихъ. Не утаи бо Богъ таковаго свѣтилника, яко же бо евангелистъ глаголетъ: не можетъ градъ укрытися верху горы стояй, ни вжегъ свѣтилника покрыеть съсудомъ; тако и сего Богъ просвѣти. Написа Святую Богородицю и вда Максиму митрополиту. Святителю же видѣвши, яко санъ бысть Святыя Богородица истинны, украси ю златомъ и каменемъ драгимъ и моляшеся ей, прося милости міру. И преставшися Максиму митрополиту, и деръзну Геронтій игуменъ подъяти санъ святительскій, возмя ризницю, и рипидію, и многія иконы, и сановники, якоже подобаетъ святителю, и ону икону Святую Богородицу, юже написа угодникъ Божій Петръ, еще сый игуменъ.


Пойде въ Костянтинъ градъ, по случаю же пріиде въ корабль и явися ему та икона Святая Богородица, юже бѣ написалъ преподобный Петръ игуменъ, рече ему: «Не имаши ты подъяти Мене, ни великаго чину священническаго, но отъ него же руку створена есмь, тый Мя восьпріиметъ, той убо святитель будетъ». Утру же бывши, заблудися корабль въ мори, и бысть блудя многи дни. Преподобному же Петру игумену вшедши во иный корабль, по Божью устроенью вскорѣ пріиде корабль въ Костянтинъ градъ. И вниде, по обычаю, въ сборъ ко преподобному патріарху Афонасію, исполнися храмъ благоуханія, и разумѣ духомъ преподобный патріархъ Афонасей, яко Богомъ посланъ есть пути святительскому, освяти его и бысть митрополитъ. И видѣша мнози вѣрніи лице его, яко солнце свѣтящися. По времени же пріиде Геронтій; патріархъ же Афонасей, испытавъ, не освяти его, но весь санъ возмя и дасть Петру митрополиту и ону святую икону, идѣже бѣ написалъ. И пришедъ во свою митрополью, и нача учити заблужшая крестьяны, ослабѣвшая нужа ради поганыхъ иновѣрець, протолкуя Евангельская писанія и апостольская, якоже великій Василей, Іоанъ Златоустый, Григорей, та ученья излагая и къ сему свое смиреніе являя, и тѣмъ утверждая истинную вѣру во крестьянѣхъ, преходя Волыньскую землю и Кіевьскую, и Создальскую землю, уча вездѣ вся. Позавидѣ дьяволъ, вложи въ сердце вражду Андрею, епископу Тферьскому, послати хулу на святаго Петра митрополита Афонасею патріярху. И посла преподобный патріярхъ Афонасей единого отъ клирикъ своихъ, мужа сановита, разсудна и разумна, мудра и тиха, ркущи: «Чадо Петре! Не азъ тя избрахъ, но Святый Духъ постави тя пастуха и учителя Христову стаду словесныхъ овець. Се пріидоша отъ вашего языка словеса тяжка на твою святыню. Подщився буди предъ святымъ сборомь и дай отвѣтъ симъ словомъ». Бывши же сбору въ градѣ Переславлѣ и ту бывшю преподобному Семеону, епископу Ростовскому, и преподобному игумену Прохору сущи; пріѣхавши же клирику отъ Костянтина града и призвану сущи Андрею епископу, а князю великому Михаилу въ ордѣ бывши, но пріѣхавши сыну его, князю великому Дмитрею, и брату его Олександру, и ины князи мнози, вельможи и воеводы и множество преподобныхъ игуменъ и ерей. И абіе посрамленъ бысть Андрей, епископъ Тферьскій, святый же Петръ митрополитъ ничтоже не створи ему зла, но рече: «Миръ ти, чадо, не ты бо се створи, но діаволъ». Святый же святитель паче нача учити не токмо по градомъ, но и вся си въ страннахъ, и вся мѣста преходя; ни труда бо собѣ имѣя, ни болѣзни чюя на тѣлѣ своемъ, ни лѣности имѣя, но пекійся стадѣ Христовѣ словесныхъ овець. И се тако еретика припрѣ, пріѣхавши на прю и прокля и. Святый же болѣ подвигъ подъя пощеніе, и милостивый милостыни утвержая и ереи, како водити стада Христовыхъ овець, словеснаго стада, и черноризець и черноризици. Паче преходя грады, обрѣте градъ честенъ кротостью, зовомы Москва, въ немъ же князь бочтивъ (богочтивъ?) именемъ Ивана, сына Данилова, внука Александрова, милостива до святыихъ церкви и до нищихъ, самого горазда святымъ книгамъ, послушателя святыхъ ученій. Обитавъ во градѣ томъ, и рече бочтивому князю: «О, сыну! многое твое благочестіе, послушай мене днесь». Благочестивому князю обѣщавшися, и рече святый митрополитъ: «Да зижется церковь камена во градѣ твоемъ святая Богородица». Благовѣрный князь поклонися и рече: «Твоею молитвою, святый отче, да будетъ». Основаннѣй же бывши церкви и гробъ собѣ сотвори святыма своима рукама. По малѣ же времени възвѣщена бысть святымъ Ангеломъ смерть его. Си же нача Литургію творити о здравіе благовѣрныхъ царей и за благовѣрнаго князя Ивана, за княгиню и за дѣти и за вся воя его, и о всемъ мірѣ, за вся усопшая цари и князи, и за вся крестьяне усопшая. Кончавъ святую службу и созвавъ многи нищія, но іереи и черноризици и черноризци, и створи милостыня многи, и раздая имѣнье свое не токмо нищимъ, и ереомъ, черноризцемъ, черноризицамъ, всѣмъ церковникомъ и домочадцамъ. А благовѣрному князю не сущи тогда во градѣ. И призва единого отъ вельможь, иже бѣ устроинъ, старѣйшина граду нарецаемь, именемъ Протасей; сей бѣ на нищая милостивъ и милосердъ сердцемъ, и рече ему: «О, чадо, миръ подай, иже благовѣрному князю и всему дому его, и тобѣ миръ». И вда ему влагалище на устрой церкви и на поминаніе своея памяти, и прочая домы церковныя призва. Вечеру же бывшю, и нача святый вечернюю молитву, и еще сущи молитвѣ во устѣхъ его, и рече преподобному архимандриту Феодору, егоже воименова на митрополію: «Миръ ти, чадо, азъ почити хощу». И абіе предаетъ духъ. И послаша вѣсть ко князю. Благовѣрный же князь вскоръ (вскорѣ?) пріѣха во градъ. Несену же святому ко гробу, они же мнѣша, яко мертвеца несущи, но открыся нѣкоему иновѣрцю о святѣмъ, и видѣвъ святаго сидящи на одрѣ своемъ, съ оба полы одра его, благословяюща носящая одръ, и благовѣрнаго князя и весь родъ его, и вся крестьяне. Онѣмъ же донесшимъ въ основанную церковь, надгробную пѣснь пѣвши, и вложиша во гробъ святое его тѣло, иже бѣ самъ сотворилъ мѣсяца Декабря въ 21 день. Якоже пророкъ Давыдъ рече: праведникъ, яко финиксъ процвѣтетъ, яко кедръ, иже въ Ливанѣ; тако и сей святитель великій процвѣте, пріимъ даръ отъ Бога, исцѣленіе хромымъ подая отъ гроба своего. И бысть ему 20 дни имущи во гробѣ, уноша нѣкій имѣя руцѣ отъ роженія своего, но не владѣя ими и кормимъ быша другомъ, и тому отъ гроба своего исцѣленіе дастъ. Овому слу (слухъ?), кому простреніе дарова, и стеру очима слѣпу, и тому дастъ прозрѣнье. Молитвою святаго и ина исцѣленія быша отъ гроба его. Да егда благовѣрный князь Иванъ, написавъ та чюдеса и посла въ градъ Володимерь ко святому сбору, и, вземъ свитокъ преподобный епископъ Прохоръ, взиде на онболъ и нача чести чюдеса, бывшая въ градѣ Москвѣ отъ гроба святаго Петра митрополита. Въ той часъ онъ иновѣрець нача исповѣдати, иже видѣ благословляюща съ одра своего, и почюдися князь великій Иванъ и весь народъ, иже бѣ въ сборѣ, възрадовашеся радостью великою. Тако бо Богъ просвѣти землю Создальскую и градъ зовомый Москву, и благовѣрнаго князя Ивана, княгиню и дѣти, и раба Божія старѣйшина града. Ты же, святый святителю! намъ испроси грѣховъ оставленіе. Отъ гроба же того исцѣленія бываетъ что ся приходящимъ. И се паки ино знаменіе его: создана бысть церкви въ сборѣ милостью Святыя Богородица и Божія угодника, святаго святителя Петра митрополита, а створеніе великаго князя Ивана.

Tags: святые
Subscribe

Comments for this post were disabled by the author